ឆាកទី១
ពូឃុន
មុំ និងអ៊ុំធីម
នាយឃុនដែលខ្លួនប្រឡាក់សុទ្ធតែស៊ីម៉ង់ជាប់ខោ បានលើកូនចេញពីអង្រឹងជា មួយ ស្នាមញញឹម និងសំណើចក្អាកក្អាយរបស់កូនប្រុសសំណប់ចិត្ត។ នាយបាន និយាយទៅកូនថា ៖
នាយឃុន ៖ កូនប្រុសសំណព្វចិត្តពុក ! ថ្ងៃនេះ ពេលពុកទៅធ្វើការមាន លួច នឹកពុកដែល ទេហ្នឹង?
(សម្លឹងមុខកូន) ណកឃើញទេ ! ញញឹមបែបហ្នឹងមាន ន័យថា នឹកពុកហើយមែនទេ ? (លើកកូនថើបទាំងញញឹម)កូនដឹងទេ
ថ្ងៃនេះពុកបាន ទិញ សំលៀកបំពាក់ពីរសម្រាប់ គឺរបស់កូនមួយសម្រាប់ និងរបស់ម៉ែកូនមួយសម្រាប់ ! ចាំបន្តិចទៀត ចាំពុកយកទៅអោយម៉ែកូនឯងតែកូនត្រូវសន្យាណាថា ធំឡើងត្រូវ ធ្វើជាមនុស្សល្អអោយពុកនឹងម៉ែសប្បាយចិត្ត លឺទេ
? (ប្រពន្ធដើរចញពីផ្ទះ) អើម៉ែវា ! ឯងចង់ទៅណាហ្នឹងមានទាំងកាតាបធំបែបនេះ
?
មុំ ៖ (សម្លឹងមើលមុខកូនបន្តិចរួចងើបមុខមើលប្តី) ថ្ងៃនេះ ខ្ញុំត្រឡប់ទៅនៅស្រុកវិញហើយ !
នាយឃុន ៖(លើកដៃស្ទាបក្បាលប្រពន្ធថ្នមៗ)ម៉ែវាឯងក្តៅខ្លួនទេដឹងបានជាថ្ងៃនេះ និយាយពាក្យចម្លែកបែបនេះ ?
មុំ ៖
ខ្ញុំអត់មានក្តៅខ្លួនទេ ហើយក៏អត់មានគ្រុនដែរ ប៉ុន្តែខ្ញុំនិយាយពាក្យពិត ! មួយឆ្នាំហើយដែលខ្ញុំទ្រាំរស់នៅជាមួយលោកទាំងត្រដាបត្រដួស បានបាយព្រឹកអត់បាយល្ងាច បានអំបិលអត់ប៊ីចេង ជួនកាលអត់ប្រហុកក៏មាន ចំណែកខោរអាវពាក់តែអាវកញ្ចាស់ៗ ! ខ្ញុំមិនត្រូវការបែបនេះទេ ខ្ញុំចូលចិត្តភាពហ៊ឺហា លោកយល់អត់ ?
នាយឃុន ៖
ចុះកូន ចុះខ្ញុំ ? ម៉ែវាឯងគិតយ៉ាងណា
? (និយាយទាំងទឹកភ្នែករលីងរលោង)
មុំ ៖
ពួកយើងលែងលះគ្នាទៅ ចំណែកកូនខ្ញុំមិនយកទៅនាំតែជាប់ចំណងនោះទេ ទោះលោកយកវាទៅអោយអ្នកណា រឺ លក់អោយអ្នកណាគឺជារឿងរបស់លោក ពួក យើងឈប់ពាក់ព័ន្ធគ្នាចាប់ពីថ្ញៃនេះតទៅ !
នាយឃុន ៖
ហេតុអីក៏ម៉ែវាឯងដាច់ចិត្តយ៉ាងនេះ ? សូម្បីតែកូនដែលទើបតែកើតមិនទាន់ ស្គាល់មុខច្បាស់
ក៏ឯងមិនអាណិតដែរមែនទេ ?
មុំ ៖
អាណិត ? (សើច)ព្រោះតែអាណិតទើបខ្ញុំមកវេទនាជាមួយលោក ! លោកក៏ដឹង
ថាខ្ញុំស្រឡាញ់មុខមាត់ប៉ុណ្ណា បើខ្ញុំដឹងថារស់នៅជាមួយលោកក្ររហាមបែបនេះ ខ្ញុំនឹងមិនរៀប
ការជាមួយលោកនោះទេ តែចាត់ទុកថា ពួកយើងស្គាល់គ្នាដូចក្នុងយល់សបិទៅចុះ ! (ដើរចេញទៅ)
នាយឃុន៖ (ចាប់ដៃប្រពន្ធ)ឯងកុំទៅអី
ខ្ញុំសុំអង្វរ ! ឯងកុំធ្វើបែបនេះបានទេ ! ទោះបីជា ឯងមិនអាណិតខ្ញុំក៏ដោយ ឯងគួរតែអាណិតកូនផង ! កូននៅក្មេងខ្លាំងណាស់ ខ្ញុំមិនចង់អោយ កូនបាត់បង់ម្តាយនេះទេ
!
មុំ ៖ (ច្រានប្តី)បានហើយ
! បើពិបាកណាស់ប្រាប់វាទៅថាវាគ្មានម្តាយនេះទេរឺលោកចង់កុហក់វាបែបណាក៏បាន តែមិនចាំបាច់មកតាមខ្ញុំទេ យើងចប់គ្នាត្រឹមនឹងចុះ !
នាយឃុន៖ (យំ)ម៉ែវា …………!
ត្រលប់មកវិញមក ខ្ញុំសុំអង្វរ ! កូននៅតូចខ្លាំណាស់ វាមិនអាចរស់នៅដោយគ្នានឯងបានទេ
! ឆាប់ត្រឡប់មកវិញមក កុំទុកពួកយើងចោលអី ! (កូនយំ)កូនប្រុសកុំយំអី………អឺ…អឺៗៗៗៗកុំយំកូនកុំយំ
!
អ៊ុំធីម ៖
អើយម៉ែអាប្រុស ! អាប្រុសកើតអីហ្នឹង ហេតុអីក៏អាប្រុសយំខ្លាំងម្លេះ ? អើឃុនទេហ្អស ? ចុះម៉ែអាប្រុសទៅណា ម៉េចក៏បណ្តោយអោយកូនយំខ្លាំងបែបនេះ ? មានអោយកូនបៅហើយ
ឬ នៅ ?
នាយឃុន៖
បាទ ! នៅទេបង !
អ៊ុំធីម ៖
ទុកអោយយំខ្លាំងបែបនេះមិនបានទេ មោះអោមកបង
! បងយកវាទៅ អោយបៅទឹកបបរ ! អឺៗៗៗៗ
មកក្មួយមក ! មកអ៊ំណា ! កុំយំក្មួយ
កុំយំ ! អឺៗៗៗ……! ហើយចុះ
នេះបានបាយហូបហើយរឺនៅ ?
នាយឃុន៖ (ជូតទឹកភ្នែក
) នៅទេបង !
អ៊ុំធីម ៖
អញ្ចឹងមក ! ទៅហូបបាយផ្ទះបងទៅ ! មើលទៅ
ម៉ែអាប្រុសប្រាកដជារវល់ នៅផ្សារហើយមើលទៅ
? តោះ ! អឺៗៗៗៗៗក្មួយ ………កុំយំណាក្មួយណា
! ក្មួយចេះ !
ឆាកទី
២
វេហា និងពូឃុន
ប្រុសជានាមយុវជនម្នាក់ដែលបានរស់នៅជាមួយឪពុកអស់រយះពេល១៨ឆ្នាំ តែឥឡូវ
បានប្តូរឈ្មោះមកជាវេហា ។
កម្លោះហៅឪពុកជាទម្លាប់មកពីសាលា ៖
វេហា
៖ ពុក ! ខ្ញុំត្រលប់មកពីសាលាវិញហើយ ! ពុកនៅផ្ទះទេហ្នឹង ?
នាយឃុន ៖ អើ !
វេហា ! មកពីសាលាវិញហើយហ្អេសកូន ?
វេហា
៖ បាទពុក ! ខ្ញុំទើបតែត្រលប់មកដល់មុននេះទេ ! ចុះពុកត្រឡប់មកពីធ្វើការយូរហើយរីនៅ ?
នាយឃុន ៖ គឺពុកមកយូរគ្រាន់ហើយ
! ពុកកំពុងតែធ្វើម្ហូប ! ហើយចុះអ្វីគេនៅក្នុង ស្បោងខ្មៅនោះ
?
វេហា
៖
(លើកស្បោង) នេះជាកាដូណាពុក ! ថ្ញៃនេះខ្ញុំមានដំណឹងល្អប្រាប់ពុកតែសុំលាក់ទុកសិន !
នាយឃុន ៖ (ទះស្មាកូន)
មិនអីទេ ! ចាំប្រាប់ពុកនៅពេលល្ញាចក៏បាន ! តោះឆាប់ទៅផ្លាស់សម្លៀកបំពាក់ទៅនឹងអាលបានហូបបាយ ! ថ្ញៃនេះពុកបានធ្វើម្ហូបយ៉ាងឆ្ញាញ់សម្រាប់ឯង !
វេហា
៖
(ហិតខ្លិន) បើខ្ញុំទាយមិនខុស ប្រាកដជាត្រីចៀនហើយមែនទេពុក ?
នាយឃុន ៖ ឯងនេះ
ពូកែហិតខ្លាំងណាស់ !តោះ !ឆាប់ទៅផ្លាស់សម្លៀកបំពាក់ទៅពុកចាំ!
វេហា
៖ បាទពុក !
វគ្គទី៣
វេហា
និងឪពុក
វេហាចេញពីក្នុងផ្ទះឃើញឪពុក អង្គុយលើគ្រែ ក៏សួរទៅកាន់ឪពុក
៖
វេហា ៖
ពុក ! នេះពុកនៅមិនទាន់ចូលសម្រានទេរឺ ?
នាយឃុន៖ (សម្លឹងមុខកូន)វេហា
! មោះមកអង្គុយេជិតពុកមក ! ពុកកំពុងអង្គុយចាំឯង មកសូត្រច្បាប់ប្រុសអោយពុកស្តាប់បន្តនឹងណា !មកសូត្រអោយពុកស្តាប់ទៀតទៅ !ឯងសូត្រ
ដល់ណាហើយ !
វេហា ៖ (មើលសៀវភៅ)គឺដល់វគ្គទី៤ហើយពុក
!
នាយឃុន៖ អញ្ចឹងសូត្រវគ្គទី៥បន្តអោយពុកស្តាប់មក ពុកចាំស្តាប់
!
វេហា ៖
បាទពុក ! (សូត្រ )
»
នឹងដើរដូចភជុង្គ ឱយឱនអង្គអាចបារម្ភ
ឱយត្រូវនឹងច្បាប់ ក្រម
គួរប្រតិបត្តិកុំអោយឆ្គង ។
»
រៀនបាទរៀនបាទចាស កុំច្រឡាសលើរៀមច្បង
ស្រដីនឹងអ្នកផង ពាក្យឱយគួរកុំឯងវី ។
»
អឺអើអញដាច់សាច់ ឆ្គងពាក្យពេចន៍គេស្រដី
ដើមដាលអោយអប្រិយ ស្រដីថាកូនអត់ពូជ ។
»
ចាស់ទុំមិនប្រដៅ ជេរកូនចៅទើបវាខូច
គេថាកូនអត់ពូជ មិនដឹងច្បាប់និងចាស់ទុំ ។
»
គេដៀលដល់ម៉ែឪ កេរិ៍អាស្រូវស្អុយរហ៊ុំ
គេស្តីដើមដៀលជុំ ដំនៀលនោះមកដល់ចាស់ ។
នាយឃុន ៖ ត្រឹមហ្នឹងសិនចុះ
! ចាំស្អែកចាំសូត្រ អោយពុកស្តាប់បន្ត ! ហើយចុះដំណឹងល្អដែលចង់ប្រាប់ពុកនោះយ៉ាងម៉េចហើយ ?
វេហា ៖
អូហ៍ ! ខ្ញុំភ្លេច ! ពុកចាំមួយភ្លេតណា
! (ដើរចូលក្នុងផ្ទះ ហើយចេញមកអង្គុយជា មួយពូឃុនវិញជាមួយស្បោងខ្មៅ)!
ឪពុក ៖
ស្អីគេនឹងវេហា ?
វេហា៖ (ស្រាយថង់
ហើយលូកយកក្រដាសរឹងមួយអោយឪពុក)
នេះជាកាដូសម្រាប់ពុក!
នាយឃុន ៖ ស្អីគេណ្នឹងវេហា ?
វេហា ៖
អ្វីដែលពុកកំពុងទន្ទឹងរងចាំ ខ្ញុំបានយកវាមកអោយពុកបានហើយ ! តំណែង សិស្សពូកែលេខមួយផ្នែកអក្សរសាស្រ្តខ្មែរ ខ្ញុំធ្វើជូនពុកបានហើយ ! បើគ្មានពុកទេខ្ញុំក៏គ្មានថ្ញៃ នេះដែរ ! ថ្ញៃនេះជាថ្ញៃពិសេសរបស់ខ្ញុំនឹងពុក ! ហើយនេះជាលិខិតសសើរសិស្សពូកែផ្នែកអក្សរ សាស្រ្តខ្មែរណា ពុក !
នាយឃុន ៖ ( សប្បាយចិត្ត
ទាំងលើកលិខិតសសើរនោះមកអោបជាប់ដើមទ្រូង ) ពុកអត់ មានអ្វីជាកាដូសម្រាប់អោយកូនទេ !
វេហា ៖
ពុកកុំនិយាយអញ្ចឹងអី ! គ្រប់សិស្សកូកែជាច្រើនទៀតគឺគេបានកាដូពីឪពុកម្តាយ របស់គេ ប៉ុន្តែខ្ញុំមិនចង់បានអ្វីពុកទេ ! បើគ្មានពុកទេ ខ្ញុំក៏អត់មានលទ្ធផលដូចថ្ញៃនេះដែរ ! ទោះ បីជាខ្ញុំគ្មានម៉ែនៅក្បែរដូចគេដទៃ ប៉ុន្តែពុកបានផ្តល់នូវភាពកក់ក្តៅ ស្នាមញញឹម
កម្លាំងចិត្ត ជាពិសេសគឺការ អប់រំដ៏ល្អ
ហើយវាធ្វើអោយខ្ញុំគិតថា ពុកប្រៀបដូចជាឪពុកផង និងជាម្តាយ ផង ! ទោះបីជាតិ
នេះគ្មានម្តាយក៏ដោយ ប៉ុន្តែពុកជាកម្លាំងចិត្តដល់ខ្ញុំ ! អរគុណគ្រប់យ៉ាងដែល ពុកបានផ្តល់ អោយខ្ញុំ
!
នាយឃុន ៖ វេហាកូន
! ( អោបកូនហើយលួចយំក្រោយខ្នង )
វេហា
៖ ពុកយំទៀតហើយមែនទេ ?
នាយឃុន ៖ អត់ទេ
! គឺពុកសប្បាយចិត្តដែលបានកូនប្រុសល្អដូចឯង ! ពុកសុំទោសណា
!
វេហា
៖ ពុកកុំសុំទោសរឿងម៉ែអី ! ទោះបីជាគ្មានម៉ែ តែខ្ញុំសន្យាថា នឹងប្រឹងរៀនសូត្រ អោយបានពូកែ ព្រោះពុកជាកម្លាំងចិត្តរបស់ខ្ញុំ ! ( អោបឪពុកដោយក្តីស្រឡាញ់ )
នាយឃុន ៖ បានហើយ
! ប្រញាប់ចូលគេងទៅ ! ស្អែកត្រូវទៅរៀនទៀត ! តោះ
! ឆាប់ចូល ដេកទៅ !
ឆាកទី
៤
នាងមុំ
និងប្តីថ្មី
(នាយហ៊ត)
១៨ឆ្នាំដែលកន្លងផុតទៅ ! ក្រោយពីបែកពីនាយឃុន នាងមុំក៏បានរៀបការជាមួយប្តីថ្មី ហើយមានកូនប្រុសឈ្មោះរ៉េត កូនឈ្មោះស្រីស៊ីណា ។ ក្រោយពីមកពីផឹកវិញ នាយហ៊តជាប្តី ប្រមឹកក៏ស្រែកហៅប្រពន្ធ
ផ្អើលពេញផ្ទះ ៖
នាយហ៊ត ៖ ( ស្រវឹង
) ម៉ែវាហ្អា ! អើយម៉ែវា ! វាទៅណាបាត់ហើយហ្នឹង
?
មុំ
៖ ( ដើរចេញពីក្នុងផ្ទះមក
) ចាស ឪវា !
នាយហ៊ត ៖ ឆាប់យកបាយមក
! យើងឃ្លានបាយហើយ !
មុំ
៖ ចាសបាន ! ខ្ញុំនឹងរៀបចំអោយ
!
នាយហ៊ត៖ អើ !
យកស្រាមកអោយអញផង ! លឺទេ ?
មុំ
៖ ចាស លឺហើយ
! ( ដើរចូលទៅក្នុងផ្ទះវិញ
)
នាយហ៊ត៖ អាណាវាធ្វើអីមុខផ្ទះអញ ! ម៉េចក៏ក្រហេងក្រហូងអញ្ចឹងវើយ ! ( ដួលលើដី
)
មុំ
៖ ឪវា ! អញ្ជើញមកហូបបានយមក
! ខ្ញុំរៀបចំរួចហើយ ! ( ឃើញប្តីដួលក៏ទុកបាយ លើគ្រែរួចរត់ចូលទៅ លើកប្តី
) ឪវា ! ឯងយ៉ាងម៉េចហើយ ?
នាយហ៊ត ៖ ( ច្រាននាងមុំ ) អញមិនអីទេ
! ទៅយកស្រាមក អញចង់ផឹកស្រា ! អោយលឿនឡើង
!
មុំ
៖ ឪវាឯងស្រវឹងហើយ ! កុំផឹកទៀតអី
! (ឃាត់ប្តី )
នាយហ៊ត ៖ ( ក្រោកអង្គុយ
) អញអោយទៅយកទៅយកមក ! ចង់តមាត់ តិចត្រូវ
! ឆាប់ទៅ !
មុំ
៖ ប៉ុន្តែឯងស្រវឹងហើយ !
នាយហ៊ត ៖ អាណាថា
អញស្រវឹង ? ( ដួលសន្លប់ )
មុំ
៖ (គ្រវីក្បាល ) ថ្ងៃណាក៏ឃើញតែស្រវឹងដែរ ! នេះជាកម្មពារខ្ញុំមែនទេ ? ( ដកដង្ហើមធំ
ហើយគ្រាហ៍ ប្តីទៅដាក់លើគ្រែ )
ឆាកទី ៥
រ៉េត និងរដ្ឋា
រដ្ឋា
៖ នែអារ៉េត ! អញឃើញហ្អែងធ្វើមុខក្រញ៉ូវតាំងពីព្រលឹមមកម្លេះ ? ហ្អែងមានរឿង អីហ្អា
?
រ៉េត
៖
( គ្រវៀសដៃ ) ហ្អែងកុំមកចេះ ! អញកំពុងតែពិបាកចិត្តផង !
រដ្ឋា
៖ ពិបាករឿងអីហ្អា ?
រ៉េត
៖ ខែនេះអញប្រឡងធ្លាក់ទៀតហើយ ! អញគួរប្រាប់
ម៉ែអញថាយ៉ាងម៉េចទៅ ?
រដ្ឋា
៖ ស្អីគេហ្អា ? ម៉ែហ្អែងអីក៏វេទនាម្លេះហ្អា ? ម៉ែអញមិនដែលខ្វល់ ចង់អញប្រឡង
ធ្លាក់ប៉ុន្មានខែ ក៏គាត់មិនខ្វល់ ! ចុះម៉ែហ្អែងអីក៏រឿងច្រើនម្លេះហ្អា ?
រ៉េត
៖ ហ្អែងឈប់និយាយទៅ ! អញឈឺក្បាលណាស់ហ្អា !
រដ្ឋា
៖ ហ្អែងកុំគិតច្រើនពេក ! មោះអញប៉ាវផឹក
! តោះទៅ !
រ៉េត
៖ អញអត់មានលុយទេណា !
រដ្ឋា
៖ កុំភ័យ ! មោះអញប៉ាវ
! ( គៀកករកគ្នាដើរទៅ )
ឆាកទី ៦
នាងមុំ
និងកូនស្រី (ស៊ីណា )
ស៊ីណា
៖ ម៉ែ ! បងរ៉េតអត់ទៅសាលាទេ
! តើខ្ញុំបានអីឃជិះទៅសាលាទៅ ? នេះជិតដល់ ម៉ោងហើយ
!
មុំ
៖ ហេតុអីក៏បងប្រុសឯងមិនទៅសាលា ?( បោសសម្រាមបណ្តើរ
)
ស៊ីណា
៖ ខ្ញុំមិនដឹងទេម៉ែ ! ម៉ែទៅនិយាយជាមួយគាត់បន្តិចទៅ !
មុំ
៖ បាន ! ចាំម៉ែទៅ
និយាយជាមួយ !
ឆាកទី ៧
នាងមុំ
ស៊ីណា និងរ៉េត
មុំ
៖ រ៉េត ! នេះកូនមិនទៅសាលាទេរឺ
?
រ៉េត
៖ ខ្ញុំអត់ទៅទេម៉ែ !
ស៊ីណា
៖ បើបងមិនទៅទេ បងជួយជូនខ្ញុំទៅសាលាបន្តិចមក ថ្ងៃនេះខ្ញុំមានប្រឡងប្រចាំ ខែផង
!
រ៉េត
៖ (គំហកដាក់ប្អូនស្រី ) បងប្រាប់ហើយថាបងមិនទៅទេ !
មុំ
៖ ហេតុអីក៏កូនមិនទៅ ? កូនមានរឿងអីមែនទេ ?
រ៉េត
៖ ម៉ែគិតមើលទៅ ! ម៉ូតូ
០១០ អាកញ្ចាស់មួយហ្នឹង ខ្ញុំជិះឡើងធុញទៅហើយ តើពេល ណាទើម៉ែដូរម៉ូតូអោយខ្ញុំ ?
មុំ
៖ ដូរម៉ូតូ ? ឯងអោយម៉ែទៅរកលុយពីណាមក ? ឯងក៏ដឹងថា ម៉ែលក់បន្លែមួយថ្ងៃបាន ប៉ុន្មាន ហើយម៉ែមានលុយឯណាទៅដូរម៉ូតូអោយឯងនោះ !
រ៉េត
៖ ខ្ញុំមិនដឹងទេ ! ០១២
ចេញហើយ បើម៉ែមិនដូរអោយខ្ញុំ ខ្ញុំឈប់ទៅសាលាជារៀង រហូត !
មុំ
៖ ឯងធ្វើអញ្ចឹងអត់បានទេ ! អនាគតឯងនៅវែងឆ្ងាយ បើឯងឈប់រៀន តើឯងទៅធ្វើ
អីទៅ ?
រ៉េត
៖ បើអញ្ចឹងម៉ែឆាប់ដូរម៉ូតូអោយខ្ញុំមក ! ខ្ញុំសន្យាថា នឹងទៅរៀនអោយបានទៀងទាត់ ! ណាម៉ែណា
! ដូរអោយខ្ញុំទៅ ណាម៉ែណា !
មុំ
៖
( គិតមួយសន្ទុះ ទាំងចិត្តរេរា ) អើៗ
! តែត្រូវសន្យាជាមួយម៉ែថា ត្រូវទៅសាលា
ម៉ែនឹងដូរ អោយ !
រ៉េត
៖ បាទម៉ែ ! ខ្ញុំទៅប្តូរសម្លៀកបំពាក់ទៅរៀនថ្ងៃនេះតែម្តង ! ( រត់ចូលទៅក្នុងផ្ទះទាំង សប្បាយចិត្ត )
ស៊ីណា
៖ ម៉ែ ! ចុះខ្ញុំនោះ
?
មុំ
៖ ឯងស្អីដែរ ?
ស៊ីណា
៖ ខ្ញុំត្រូវការទិញគ្រឿង Make Up ស្បែកជើងកែង
កាបូបស្ពាយ ខោអាវ និងលុយ
ចាយថ្ងៃនេះ !
រ៉ែត
៖ ស៊ីណាអើយ ! ទៅសាលា
! អោយលឿនឡើង ! បងប្រញាប់ !
ស៊ីណា
៖ ម៉ែ ! បងរ៉េតទៅចោលខ្ញុំឥឡូវហើយ ! ឆាប់អោយលុយមក !
មុំ
៖
( ដកដង្ហើម ) ណេះ ! ម៉ែមានតែប៉ុណ្នឹងទេ
! យកទៅ !
ស៊ីណា
៖ អរគុណម៉ែ ! ខ្ញុំស្រឡាញ់ម៉ែណាស់
! ( ថើបម្តាយ ) ខ្ញុំទៅសាលាហើយណាម៉ែ
!
ឆាកទី ៨
វេហា និងនាយឃុន
នាយឃុនរៀបនឹងចេញទៅធ្វើការ វេហាដើរពីក្រោយក៏និយាយ ៖
វេហា
៖ ពុក ! ខ្ញុំទៅសាលាហើយណា ពុក !
ឪពុក
៖ វេហា ! ថ្ងៃនេះ
ពុកអត់មានលុយទេ ! កូនទៅរៀនអត់លុយមួយថ្ងៃសិនទៅណា !
វេហា
៖ ពុកកុំបារម្មណ៍អី ! អូ !
ខ្ញុំភ្លេច ! នេះជាលុយដែលពុកអោយខ្ញុំរាល់ថ្ងៃ ខ្ញុំសន្សំវាជា រៀងរាល់ថ្ងៃ ! ពុកទុកទិញម្ហូបវិញចុះ
! ខ្ញុំទៅរៀនដើម្បីចំណេះ ចំណែកលុយអត់សំខាន់នោះទេ!
ឪពុក
៖ កុំអី ! កូនទុកលុយនេះចុះ
! ក្រែងលរថ្ងៃណាមួយ កូនត្រូវទិញអ្វីមួយ កូននឹងមាន
លុយផ្ទាល់ខ្លួន !
វេហា
៖ អត់អីទេពុក ! យើងដើរមួយថ្ងៃ គិតមួយថ្ងៃ ! ថ្ងៃនេះ
យើងគិតមួយថ្ងៃសិន ! ថ្ងៃ ស្អែកចាំយើងគិតទៀត
! ពុកទុកលុយនេះចុះ ! ខ្ញុំទៅសាលាហើយពុក !
ឪពុក
៖ វេហា ! ពុក…………………!
វេហា
៖ ( កាត់សម្តីឪពុក ) ពុកកុំនិយាយពាក្យសុំទោសអី ! ខ្ញុំទេដែលត្រូចសុំទោសពុក ! ខ្ញុំនឹងប្រឹងរៀនណា ពុក ! ពុកត្រូវតែញញឹម
! ខ្ញុំទៅរៀនហើយពុក !
ឆាកទី
៩
វេហា និងស៊ីណា
ស៊ីណា
៖ ជួយផង ! ចោរឆក់កាបូបខ្ញុំហើយ
!
វេហា
៖
( ចោររត់មកបុកវេហា ) អូយ
! សុំទោសប្អូន ! មានត្រូវត្រង់ណាខ្លះទេ ? នេះជា
កាបូបរបស់ប្អូន ! បងសុំទោសផង !
ស៊ីណា ៖ ( មកទាន់
) បងប្រុស ! កុំអោយកាបូបនោះទៅវាអី ! វាជាកាបូបរបស់ខ្ញុំទេ
! វាឆក់របស់ខ្ញុំទៅ !
វេហា
៖
( ឆក់កាបូបមកវិញ ) ហេតុក៏ប្អូនរកស៊ីឆក់ប្លន់គេអីបែបនេះ ? យើងជាកូនប្រុស មានដៃជើងរឹងមាំ ទៅរកកាងារធ្វើដើម្បីបានប្រាក់ចាយទើបល្អ មិនត្រូវរកស៊ីលួចគេបែបនេះទេ!
ចោរ
៖ បងប្រុស ! កុំចាប់ខ្ញុំអោយប៉ូលីសអី ! ខ្ញុំដឹងខុសហើយ !
វេហា
៖ បងមិនចាប់ប្អូនអោយប៉ូលីសទេ ! ប៉ុន្តែប្អូនត្រូវសន្យាថា មិនត្រូវលួចឆក់គេបែប នេះ ទៀតទេ ! លឺទេ
?
ចោរ
៖ បាទបងប្រុស ! ( គេចខ្លួនដើរចេញទៅបាត់
)
វេហា
៖
( ដើរឆ្ពោះទីស៊ីណា ) នេះជាកាបូបរបស់ប្អូន !
ស៊ីណា
៖ ( ស៊ីណាសំពះវេហា រួចទើបទទួលកាបូប
) អរគុណបងប្រុស ! នេះជាលុយ ដែលខ្ញុំត្រូវទិញគ្រឿង Make Up ផង
បើវាឆក់ទៅ បាត់ ខ្ញុំប្រាកដជាអង្គុយយំមិនខាន !
វេហា
៖ ប្អូនជាស្រីនៅក្មេងណាស់ មិនគួរគិតពីរឿង
Make Up នោះទេ ! វ័យប្អូនជាវ័យ សិក្សា
មិនគួរខ្វល់ពីរឿងនោះឡើយ ! ជាពិសេស ប្អូនជាស្រីមិនគួរដើរផ្លូវស្ងាត់តែម្នាក់ឯងបែប នេះទេ
! ចុះផ្ទះប្អូននៅឯណា?
ស៊ីណា
៖ ចាស ! គឺហួសផ្លូវស្ងាត់នេះប្រហែល ៥០០ ម៉ែត្រគឺដល់ហើយបងប្រុស ! និយាយអញ្ចឹង ខ្ញុំនៅមិនទាន់ស្គាល់ឈ្មោះបងប្រុសចិត្តល្អនៅឡើយទេ ! តើបងឈ្មោះអ្វីទៅ ?
វេហា
៖ បាទ ! បងឈ្មោះ
វេហា ! តោះបងជូនទៅផ្ទះ ! នៅឆ្ងាយទៀតទើបដល់ផ្ទះ ផ្លូវនេះ មិនគួរទុកចិត្តទេ
!
ស៊ីណា
៖ អរគុណបងប្រុសហើយ !
វេហា
៖ គុណស្រ័យមិនសំខាន់ទេ សំខាន់យើងជាមនុស្សដូចគ្នា ត្រូវតែជួយគ្នា ! តោះបង
ជូនទៅ !
ឆាកទី
១០
រ៉េត រដ្ឋា
ស៊ីណា វេហា មុំ
ថ្ងៃនេះ រ៉េតបានគេចសាលាមិនចូលរៀន ព្រោះមិត្តភ័ក្ករបស់គេឈ្មោះរដ្ឋាបានបបួលគេ ទៅដើលេង
រហូតធ្លាយដល់ផ្ទះគេ ។ រដ្ឋាឃើញស្រ្តីម្នាក់ស្រដៀងម្តាយរ៉េត គេក៏សួរ ៖
រដ្ឋា
៖ អារ៉េត ! នោះហ្ន
! ដូចជាម៉ែហ្អែងមែនទេ ?
រ៉េត
៖
(ច្បាស់ថាម្តាយខ្លួន រ៉េតក៏រកលេសដោះសារ
) ហ៊ើយ
! អាល្ងង់ ! ហ្អែងមើលមុខ អញថា សង្ហារប៉ុណ្ណា
! ម៉ែអញ មិនមែនមុខអាក្រក់អញ្ចឹងទេ ! ហ៊ើយ ! ថ្ងៃនេះ ម៉េចក៏ជួបតែ មនុស្សមុខអាក្រក់អញ្ចឹងហ្អា ! តោះ
ជូនអញទៅផឹកទៅ !
រដ្ឋា
៖ ( គៀកកររ៉េត )អើ
បានតើ ! តែត្រូវប៉ាវអញ !
រ៉េត
៖ ប៉ាវក៏បាន ! អោយតែអញបានសប្បាយចិត្ត ! ( ប្រទះស៊ីណាក្រោយខ្នង
)
ស៊ីណា
៖ បងរ៉េត ! ហេតុអីក៏បងនិយាយអញ្ចឹង ? បងមិនគួរនិយាយបែបនេះអោយម៉ែ នោះទេ
! គាត់ជាម៉ែរបស់យើណា !
រ៉េត
៖
( ច្រានប្អូន ) ឯងកុំមកចេះ ! ចេញទៅ
! ( សម្លឹងមុខវេហា ថែមទាំងចង្អុលមុខកម្លោះ រួចដើរចេញទៅ
)
វេហា
៖ ប្អូនស្រីយ៉ាងម៉េចហើយ ?
ស៊ីណា
៖ ខ្ញុំមិនអីទេ បងវេហា
! ម៉ែខ្ញុំមកពីសាលាវិញហើយ !
មុំ
៖ អើ ! ស៊ីណា!
នាំមិត្តភ័ក្កអង្គុយលេងសិនទៅ ម៉ែលាងដៃបន្តិចសិន
!
ស៊ីណា
៖ បងវេហា ! អង្គុយលេងសិនទៅ ខ្ញុំទៅយកទឹកមកជូនបងពិសារ !
វេហា
៖ មិនអីទេ ! បងទៅវិញសិនហើយ
!
មុំ
៖
( ដើរចេញមក ) ម៉េចក៏ប្រញាប់ទៅវិញម្លេះក្មួយ ?
វេហា
៖ ( លើកដៃសំពះ ) ជម្រាបសួរមីង !
មុំ
៖ (សំពះតប )ចាស
លើកដៃថ្វាយព្រះក្មួយ !
ស៊ីណា
៖ម៉ែ! ថ្ងៃនេះ
ខ្ញុំត្រូវចោរឆក់កាបូប ហើយបានបងប្រុសវេហាជួយ បើមិនអញ្ចឹង ទេ លុយដែលម៉ែអោយកាលពីព្រឹកមិញ ប្រាកដជាវាយកចាយអស់មិនខាន !
មុំ
៖ ចុះកូនយ៉ាងម៉េចហើយ ?
ស៊ីណា
៖ ខ្ញុំមិនអីទេ ព្រោះបងវេហាជួយ
!
មុំ
៖ អរគុណក្មួយហើយដែលបានជួយកូនស្រីរបស់មីង ! មីងមិនដឹងជាមានអ្វីសងគុណ នោះទេ !
វេហា
៖ មិនមានគុណស្រ័យអ្វីនោះទេ ! បើយើងឃើញមនុស្សកំពុងតែលង់ទឹកហើយ បើ មិនជួយ
មិនកើតនោះទេ ! ប៉ុន្តែសុំមីងកុំបណ្តោយអោយស៊ីណាទៅណាមកណាតែម្នាក់ឯង បែបនេះអី
! ផ្លូវនេះស្ងាត់ណាស់ ម៉្យាងស៊ីណាជាស្រីផង !
មុំ
៖ ចាស ! យ៉ាងណាក៏អរគុណក្មួយដែរ !
វេហា
៖ មិនអីទេមីង ! ខ្ញុំលាមីងទៅវិញសិនហើយ ! បងទៅហើយណាស៊ីណា !
កុំទៅណាមកណា
តែម្នាក់ឯងទៀតអី ! វាគ្មានសុវត្តិភាពសម្រាប់ប្អូនជាស្រីនោះទេ !
បងទៅហើយ !
ស៊ីណា
៖ អរគុណបងប្រុសល្អ !
មុំ
៖ តោះ ! ផ្លាស់សម្លៀកបំពាក់ទៅ ហើយជួយលាងបន្លែម៉ែយកទៅបោះអោយម៉ូយ !
ស៊ីណា
៖ ចាស ម៉ែ
!
ឆាកទី ១១
វាហា និងអ៊ុំធីម
ព្រោះតែចង់ដឹងពិប្រវិត្តពិតរបស់គ្រួសារ វេហាក៏បានទៅផ្ទះអ៊ុំស្រីម្នាក់ដែលបានជួយ
មើលថែគេកាលពីកុមារភាព ។ កម្លោះមកដល់ក៏ស្រែកហៅឈ្មោះអ៊ុំធីម ៖
វេហា
៖ អ៊ំធីម ៗ ! អ៊ំនៅផ្ទះទេហ្នឹង
?
អ៊ុំធីម ៖ នរណាគេរកអីដែរ
? អូ
! វេហាទេហ្អេស ! មោះចូលមកអង្គុយលេងជា មួយអ៊ំសិនមកក្មួយ
!
វេហា
៖ បាទអ៊ំ !
អ៊ុំធីម ៖ ថ្ងៃនេះ
ខ្យល់អីបក់ក្មួយប្រុសដ៏សង្ហាររបស់អ៊ំអោយមករកអ៊ំដល់ផ្ទះបែប នេះ
?
វេហា
៖ គឺខ្ញុំមកចង់សួរអ៊ំរឿងខ្លះ តើបានទេអ៊ំ
?
អ៊ុំធីម ៖ អ្នកណាថា
មិនបាន ! អ៊ំស្វាគមន៍ជានិច្ចក្មួយ !
វេហា
៖ ១៨ ឆ្នាំនេះ
ខ្ញុំរស់នៅក្នុងភាពអាថ៍កំបាំងបំផុត សូម្បីតែមុខម្តាយខ្ញុំក៏ខ្ញុំមិនស្គាល់ ពុកប្រាប់ថា
ម៉ែស្លាប់បាត់ទៅហើយ ប៉ុន្តែខ្ញុំមិនទាន់អស់ចិត្តនោះទេ ទើបបានជាមកសួរអ៊ំ ! អ៊ំអាចប្រាប់ខ្ញុំពីដំណើររឿងខ្លះបានទេ ?
អ៊ុំធីម ៖ ( ដកដង្ហើមធំ
) នេះជារឿងដ៏កំស្សត់ដែលកន្លងហួស ១៨
ឆ្នាំហើយ ! អ៊ំពិត ជាមិនចង់និយាយវាអោយក្មួយដឹងនោះទេ !
វេហា
៖ ដូច្នេះ អ៊ំដាច់ចិត្តទុកអោយខ្ញុំរស់នៅក្នុងភាពអាថ៍កំបាំងបែបនេះរហូតមែនទេ ?
អ៊ុំធីម ៖ គឺ
១៨ ឆ្នាំមុន ម្តាយរបស់ក្មួយបានចុះចេញពីផ្ទះ តាំងពីក្មួយមានអាយុ ៣
ខែនៅឡើយ ចំណែករឿងក្រៅពីហ្នឹងទៀតអ៊ំមិនដឹងទេ !
វេហា
៖ ការពិតរឿងបែបនេះទេបានជាពុកកហុកខ្ញុំ !
អ៊ុំធីម ៖ អ៊ំគិតថា
ពុកឯងមិនចង់អោយឯងគិតច្រើនទើបពុកឯងមិននិយាយរឿង នេះប្រាប់
! ខំរៀនណា កុំគិតច្រើនពេក !
វេហា
៖ បាទអ៊ំ ! អរគុណអ៊ំហើយ
! ខ្ញុំលាអ៊ំទៅវិញសិនហើយ !
អ៊ុំធីម ៖ ផ្តាំសួរសុខទុក្ខពុកក្មួយអោយអ៊ំផងណា !
វេហា
៖ បាទអ៊ំ !
ឆាកទី
១២
វេហា និងរ៉េត
ជាមួយក្រុមសិស្ស
រ៉េត
៖
ជួយខ្ញុំផង !
វេហា
៖ ឈប់សិន ! មានរឿងអីហ្នឹង
? (ពូឃុនចូលទៅលើរ៉េតចេញមក វេហាក៏ចូលទៅ ឃាំងពីមុខក្រុមសិស្ស )
ក្រុមសិស្ស
៖ នេះជាប្អូនរបស់ឯងមែនទេ?
វេហា
៖ បាទមែនហើយ !
ក្រុមសិស្ស
៖ អញ្ចឹងជួយប្រដៅវាអោយបានល្អផង ! កុំចេះតែដើរអុកឡុកគេឯង ធ្វើ អោយគេមិនបានរៀនសូត្រ
! បើយើងមិនចង់រៀនទេ
កុំដើរបបួលគេអោយមកពាលជាមួយ យើង
! បើមានលើកក្រោយទៀត ឯងប្រាកដជាមិនរួចខ្លួនទេ ! តោះពួកយើងទៅវិញ
!
វេហា
៖
( ក្រឡេកមកសួររ៉េត ) យ៉ាងម៉េចប្អូន ? ដូចអ្វីដែលគេបាននិយាយទេ ?
រ៉េត
៖
( ខ្ទប់ក្បាលទាំងឈាមហូរ ) មិនមែនខ្ញុំទេបង ! ការពិតគឺមិត្តភ័ក្កខ្ញុំទេដែលទៅ បបួលគេ តែខ្ញុំដើរជាមួយគ្នា ទើបគេគិតថា ខ្ញុំទៅ
!
វេហា
៖ បងមិនមែនចង់ប្រដៅប្អូន រឺអ្វីនោះទេ
ប៉ុន្តែបងចង់អោយប្អូនចេះរកមិត្តភ័ក្ក អោយបានល្អ
សឹមរាប់អាន កុំអោយនាំរឿងដល់ខ្លួនយើង ! ចុះឥឡូវ យ៉ាងម៉េចហើយ
?
រ៉េត
៖ ខ្ញុំមិនអីទេបង ! ប៉ុន្តែខ្ញុំមិនហ៊ានទៅផ្ទះតែម្នាក់ឯងនោះទេ ! បងជួយទូរស័ព្ទទៅ ហៅម៉ែខ្ញុំអោយមកទទួល ខ្ញុំផងបានទេ
?
វេហា
៖ អញ្ចឹងទៅផ្ទះបងសិនទៅ ! ចាំទូរស័ព្ទអោយគាត់មកទទួលតាមក្រោយ !
រ៉េត
៖ បាទបង !
ឆាកទី
១៣ (បញ្ចប់ )
វេហា ស៊ីណា
រ៉េត មុំ ពូឃុន និងនាយហ៊ត
ស៊ីណា
៖ម៉ែ
! បើតាមបងរ៉េតប្រាប់មក ខ្ញុំថា
ផ្ទះនេះហើយ !
មុំ
៖ ម៉ែក៏មិនប្រាកដដែរ ! សាកចូលទៅសួរគេសិនទៅ
!
ស៊ីណា
៖ ចាសម៉ែ !
រ៉េត
៖
( រត់ចេញមក ) ម៉ែ……!
មុំ
៖
( អោបកូន ) រ៉េតកូន ! កូនយ៉ាងម៉េចហើយ
?
រ៉េត
៖ ខ្ញុំមិនអីទេ ព្រោះបានបងប្រុសម្នាក់ជួយខ្ញុំ !
ស៊ីណា
៖ បងវេហា ! (លាន់មាត់
)
វេហា
៖ ជម្រាបសួរអ្នកមីង !
មុំ
៖ ចាស ជម្រាបសួរក្មួយ
! នេះជាលើកទីពីរហើយដែលក្មួយបានជួយកូនមីង ! មីងមិន
ដឹងថា បានអីសងគុណក្មួយនោះទេ !
វេហា
៖ កុំនិយាយពាក្យគុណអីមីង ! ខ្ញុំនៅក្មេងណាស់ មិនសមអោយមនុស្សចាស់សង គុណនោះទេ
!
ឪពុក
៖ វេហា ! នាំប្អូនមកហូបបាយសិនទៅកូន !
មុំ
៖ បងឃុន ! ( លាន់មាត់
)
ឪពុក
៖ មុំ ! ( លាន់មាត់ធ្វើអោយបួននាក់នោះសម្លឹងមុខគ្នា នាយឃុនចូលទៅអូសដៃកូន
) វេហា ! ឆាប់ចូលទៅក្នុងផ្ទះវិញទៅ ! ទីនេះអស់តួនាទីរបស់កូនហើយ !
មុំ
៖ ( ដើរទៅឃាត់នាយឃុន) ឈប់សិនបងឃុន
! បងនៅខឹងនឹងខ្ញុំចំពោះរឿងកាលពី ១៨
ឆ្នាំនោះទៀតមែនទេ ?
ឪពុក
៖ វេហា ! ពុកប្រាប់អោយកូនចូលផ្ទះ !
វេហា
៖(
ដករូបថតចេញពីហោរប៉ាវមើល ) តើពុកចង់កហុកខ្ញុំដល់ណាទៀត ? តាមពិត
គឺម៉ែរត់ចោលពុក ប៉ុន្តែពុកកហុកថា ម៉ែស្លាប់
! ពុកកហុកខ្ញុំធ្វើអ្វី ?
ឪពុក
៖ ស្តាប់ពុកណា វេហា
! មនុស្សនៅក្នុងរូបថតនេះ និងស្រីម្នាក់នេះ មិនមែនជាម៉ែ របស់កូនទេ
!
វេហា
៖ ពុកឈប់កុហកខ្ញុំទៅ ! ការពិតគឺម៉ែនៅរស់
!
មុំ
៖ ប្រុស ! ម៉ែសុំទោស
!
វេហា
៖ តើការសុំទោសរបស់ម៉ែអាចអោយអ្វីៗត្រឡប់ក្រោយវិញបានទេ ? អាចជំនួស
ភាពឈឺចាប់របស់ពុកវិញបានទេ ? ១៨
ឆ្នាំនេះ ពុករស់នៅទាំងវេទនា ចំណែកខ្ញុំភាពកក់ក្តៅ
ពីម្តាយតែបន្តិចក៏មិនស្គាល់ ! ខ្ញុំឃើញតែក្តីសង្ឃឹម និងស្នាមញញឹមពីពុក ចុះម៉ែវិញ
សូម្បីតែ ភាពកក់ក្តៅអោយក្មេងប្រុសអាយុបីខែម្នាក់ក៏មិនមាន តើម៉ែអាចធ្វើជាម្តាយរបស់គេបានទេ ?
ម៉ែឆាប់និយាយមក !
មុំ
៖ ប្រុស ! ម៉ែពិតជាសុំទោសពិតមែន
! កំហុសទាំងនេះម៉ែជាអ្នកសាងឡើង កូនចង់ដាក់
ទោសម៉ែក៏បាន ម៉ែទទួលខុសគ្រប់យ៉ាង តែកូនកុំគេចមុខពីម៉ែទៅបានហើយ !
វេហា
៖ ១៨ ឆ្នាំមុន ខ្ញុំយំរកម្តាយ ប៉ុន្តែការចងចាំខ្ញុំពេលនេះ គឺមានតែពុកម្នាក់គត់ ! ម៉ែ
មានប្តី ម៉ែមានកូនដែលត្រូវមើលថែ ដូច្នេះម៉ែអត់នៅជិតខ្ញុំទេ ហើយខ្ញុំក៏មិនចង់អោយពុកឈឺ ចាប់ជាងនេះទៀតដែរ
! ម៉ែឆាប់ត្រឡប់ទៅវិញទៅ ! ( ដឹកដៃឪពុកចូលក្នុងផ្ទះ )
មុំ
៖ ប្រុស ! បើកូនមិនលើកលែងទោសអោយម៉ែទេ ម៉ែនឹងលុតជង្គង់នៅទីនេះរហូត !
ស៊ីណា
និងរ៉េ ត ៖ (ស្រែក ) ម៉ែ………………!
បងវេហា………………!
នាយហ៊ត ៖ មុំ………!
វេហា
៖
( ងាកមើលម្តាយទាំងទឹកភ្នែក រួចរត់មកអោបម្តាយទាំងចិត្តមិនដាច់ ) ម៉ែ………!
មុំ
៖
( យំ
) ម៉ែសុំទោស ! ម៉ែធ្វើអោយកូនលំបាកហើយ !
ស៊ីណា
និងរ៉េត ៖ ( ចូលទៅអោបជុំគ្នា
) បងវេហា !
វេហា
៖ ម៉ែកុំសុំទោសខ្ញុំអី ! ម៉ែសន្យាបានទេថា ម៉ែឈប់ទៅចោលខ្ញុំទៀតហើយ !
មុំ
៖ ម៉ែសន្យា ! ម៉ែនឹងនៅក្បែរកូនជានិច្ច ! ម៉ែនឹងលាងកំហុសគ្រប់យ៉ាងចំពោះអ្វីដែល ម៉ែបានធ្វើខុសពីមុន
! ម៉ែសន្យា !
រ៉េត ៖ ម៉ែ ! ខ្ញុំក៏សុំទោសម៉ែដែរ ! ខ្ញុំឈប់ធ្វើបាបអោយម៉ែពិបាកចិត្តទៀតហើយ ! ( យំ )
ស៊ីណា ៖ ខ្ញុំក៏ដូចបងរ៉េតដែរណា ម៉ែ ! អភ័យទោសអោយខ្ញុំផងណា
ម៉ែ ! ( យំ )
នាយហ៊ត ៖ មុំ ! បងចង់លុបលាងកំហុស បងឈប់ផឹក បងឈប់រករឿងអូននិងកូនទៀត ហើយ តើអូនព្រមអភ័យទោសអោយបងផងបានទេ ?
មុំ ៖ ( អោបកូនទាំងបី និងប្តី ) ពួកយើងជាគ្រួសារតែមួយទៅហើយ
ដូច្នេះគ្មានពាក្យអ្វី ដែលយើងមិនអាចអត់អោនអោនអោយគ្នាបាននោះទេ !
វេហា រ៉េត ស៊ីណា ៖( ក្រោកទៅអោបពូឃុន ) ពុក…………!
មុំ ៖ខ្ញុំសុំទោសណា បងឃុន ! ខ្ញុំធ្វើអោយបងលំបាក
ចិញ្ចឹមកូនតែម្នាកឯង ! អភ័យទោស អោយខ្ញុំផងណា បង !
ពូឃុន ៖ ថ្ងៃនេះ អត់មានទោសសម្រាប់មុំ រឺអ្នកណាទាំងអស់ ! ថ្ងៃនេះ
មានតែការ សប្បាយចិត្ត! វេហា ! នេះគឺជាប្អូនៗរបស់កូនហើយ ! ត្រូវចេះស្រឡាញ់គ្នា
កុំរករឿង គុំគួនគ្នាអី ! បងក៏សូមជូនពរអោយមុំ ចេះស្រឡាញ់ប្តី និងកូនៗ គឺប៉ុណ្នឹង បងអស់បារម្ភហើយ ! កុំសុំទោសបងអី !
រ៉េត ស៊ីណា វេហា ៖ ពុក……………………!
ម៉ែ …………………! ( អោបគ្នាដោយក្តីស្រឡាញ់ )
ទីបំផុត
ពេលវេលាកន្លងហួស
អ្វីៗពិតជាមិនអាចត្រឡប់ក្រោយបានមែន
ថ្វីបើតែមុំអាច នៅជិតវេហាបានពិតមែន ប៉ុន្តែនាងក៏មិនអាចបោះបង់ចោលប្តីថ្មី
និងកូនពីរនាក់នោះបានដែរ
។ ពួកគេនៅតែរស់នៅជុំគ្នាចំណែកវេហារស់ជុំឪពុក ដដែល ហើយទៅលេងម្តាយនិងប្អូនៗជា រៀងរាល់ថ្ងៃ ។ ឯរ៉េត និងស៊ីណាក៏លះបង់ ចោលនូវគំនិតអវិជ្ជមាន
ហើយព្យាយាមដើរតាម
គន្លងរបស់បងប្រុសគេ
។ សូមអោយសុភមង្គលរបស់គ្រួសារនេះមានជានិរនរ៍ផងទៅចុះ ៕
កែសម្រួលចប់នៅថ្ងៃ អង្គារ
ទី ២៧ ខែ
ធ្នូ ឆ្នាំ ២០១១
ក្រុងព្រះសីហនុ ខេត្តព្រះសីហនុ
ហៀង ធារ៉ា
( ព្រះអាទិត្យទូច )
No comments:
Post a Comment