សួនកំណាព្យ ៖ ក្រមុំកំពតចតបេះដូងកម្លោះបាត់ដំបង

ក្រមុំកំពតចតបេះដូងកម្លោះបាត់ដំបង

(បទពាក្យប្រាំបី)​

១-បងអ្នកដូនញ៉ែមនាស្រុកបវេល

ចិត្តគ្មានមន្ទិលពេលជួបវល្ខ័ក

ម្លិះរួតទូកមាសបងស៊ូចិត្តស្ម័គ្រ

អូនជាអន្ទាក់ចំណតបេះដូង ។

២-ខេត្តកំពង់សោមអនុស្សាវរីយ៍

បងនិងឆវីជួបគ្នាដំបូង

ញញឹមសែនស្រស់ឆក់យកបេះដូង

ឲ្យធ្លាក់អណ្តូងស្នេហ៍ស្រស់ពិសី ។

៣- គ្រប់ពេលវេលានឹកតែអូនមួយ

យប់ថ្ងៃគេងព្រួយព្រោះចង់បានស្រី

ធ្វើជាគូរគ្រង់សាងស្នេហ៍ភក្តី

ស្រឡាញ់លុះក្ស័យគ្មានថ្ងៃបំភ្លេច ។

៤- នឹកថ្ងៃឆ្លងឆ្នាំកន្លងថ្មីៗ

នឹករាល់អ្វីៗមិនអាចបំភ្លេច

ស្នាមជើងពីរនាក់នៅដាមលើខ្សាច់

បងចាំជានិច្ចរាល់អនុស្សា ។

៥- បារមីយាយម៉ៅសូមជួយចាំផង

យើងសច្ចាផ្សងទាំងពីរកាយា

ស្រឡាញ់រហូតមិនប្រែចិន្តា

លុះអស់សង្ខារស្នេហាអមតៈ ៕

ក្រុងព្រះសីហនុ

ថ្ងៃទី ២២ ខែ កក្កដា ឆ្នាំ ២០១២

និពន្ធដោយ ៖ ហៀង​​ ធារ៉ា

(ព្រះអាទិត្យតូច)

រក្សាសិទ្ធិ