សួនកំណាព្យ ៖ ភូមិថ្លាចម្ការស្នេហ៍

ភូមិថ្លាចម្ការស្នេហ៍

(បទពាក្យប្រាំបី)

១- បារាយណ៍បានជិតជីនិតបានស្នេហ៍

កំពង់ស្វាយក្បែរសន្ទុកប្រាថ្នា

សណ្តាន់ជួបភ័ក្រ្កស្ទឹងសែនស្នេហា

បែកចានវាចាអណ្តូងពោធ៍ស្នេហ៍ស្រី ។

២_ ប្រាសាទសំបូរណ៍បរិបូរណ៍ចិត្តស្មោះ

តាំងគោងផ្តងផ្តោះច្រនៀងភក្តី

សៀមរាយចង់ប្រាប់ស្រះបន្ទាយក្តី

កន្ទុំស្នេហ៍ថ្មីស្រីអ្នកចម្ការ ។

៣- រស្មីរំដោះចិត្តស្មោះឥតល្អៀង

សូយោងព្រមព្រៀងច្រៀងរឿងស្នេហា

ពង្រគួចចិត្តអូរាំងប្រាប់ថា

ផ្កាស្រុកចម្ការផស់ខ្លុយកើតទេ ។

៤- ខ្លុយលិចច្រណែនខ្ញោមលួចប្រច័ណ្ឌ

តាម៉ីបានកាន់ដៃស្រស់មាសមេ

ថ្មអណ្តែតខកចិត្តជ្រលងនឹកគេ

អណ្តូងច្រុះបំពេរកំណាព្យរាត្រី ។

៥- វាលតូចឈឺចាប់គ្រើលហូរទឹកភ្នែក

ទួលតាអៀមស្រែកប្រាប់បេះដូងស្រី

រំលងសង្វែកតែងនឹករំពៃ

ជីវភាពនឹកដៃស្រីម្ចាស់ចំការ ។

៦- ត្រពាំងវែងលឺក៏ចាប់ចិត្តភ្លាម

សំរៀងដាមដៀមព្រោះចង់ស្នេហា

ភូមិប៉ាងស្រម៉ៃចង់ប៉ះកាយា

ហាន់ទ្វាររៀបការតែមិនបាននាង ។

៧- ខកចិត្តស្ទើរអស់កម្លោះពេញស្រុក

មានខ្លះកើតទុក្ខស្ទើរតែស្រែកច្រៀង

អង្វរក្រមុំសុំស្រឡាញ់នាង

ប៉ុន្តែចម្រៀងច្រៀងមិនបានស្នេហ៍ ។

៨- ថ្លាក្រៅមិនជ្រួលព្រោះជាគូរព្រេង

មិនមែនថាលេងកុហកអ្នកទេ

ផ្កាស្រុកស្រែនេះគឺមានម្ចាស់ស្នេហ៍

គូរពីបុព្វេរគឺកវីនេះ ៕

ក្រុងព្រះសីហនុ

ថ្ងៃទី ២២ ខែ កក្កដា ឆ្នាំ ២០១២

និពន្ធដោយ ៖ ហៀង ធារ៉ា

(ព្រះអាទិត្យតូច)

រក្សាសិទ្ធិ