(បទពាក្យប្រាំបី)
១-នឹកកាលកុមារមាតានៅក្បែរ
ពុកថ្នាក់ថ្នមថែបីបមរក្សា
ម៉ែថ្នមបុត្រីដូចទេពធីតា
ពុកថ្នមបុត្រាដូចទេវបុត្រ ។
២-ដល់កូនដឹងក្តីម៉ែបីចិញ្ចឹម
ពុកស្ម័គ្រស៊ូប្រឹងមិនខ្លាចនឿយហត់
រកប្រាក់ឱ្យរៀនខ្លាចកូនក្រក្សត់
ពុកម៉ែស៊ូហត់ខ្លាចកូនល្ងង់ខ្លៅ ។
៣-ពុកម៉ែធ្វើការមិនដែលលំអៀង
ម៉ែប្រឹងក្រោមភ្លៀងពុកប្រឹងហាលក្តៅ
បង្រៀនកូនៗទូន្មានប្រដៅ
អប់រំកូនចៅរស់ដោយសមធម៌ ។
៤-ទៅណាមកណាកុំឆ្មើងកុំឆ្មៃ
ទោះចាស់ក្មេងក្តីត្រូវមានសីលធម៌
លំទោនគោរពមិនត្រូវរើសពណ៍
ទោះមានរឺក្រសុទ្ធសឹងតែខ្មែរ ។
៥-ពេលកូនឃ្លាតឆ្ងាយកាយកូនកំព្រា
តែមិនរងាព្រោះចាំពាក្យម៉ែ
ខិតខំរៀនសូត្រធ្វើសិស្សពូកែ
យកជ័យឱ្យម៉ែឱ្យពុកញញឹម ។
៦-ធ្វើជាកូនល្អក្នុងគ្រួសារ
យកការសិក្សាធ្វើក្តីសង្ឃឹម
មិនថាភ្លៀងខ្លាំងរឺក៏រលឹម
ត្រូវមានសង្ឃឹមទទួលថ្ងៃថ្មី ។
៧- កំណាព្យសងគុណសូមស្មូតបំពេរ
ថ្នមចិត្តពុកម៉ែធ្លាប់ផ្តល់រស្មី
កូនមានថ្ងៃនេះព្រោះមានអ្នកថ្លៃ
ចិត្តស្មោះភក្តីសងគុណអ្នកវិញ ៕
និពន្ធចប់នៅភ្នំពេញ
ថ្ងៃ សុក្រ ទី ០១ ខែ ឧសភា ឆ្នាំ ២០១២
និពន្ធដោយ
៖ ហៀង ធារ៉ា
( ព្រះអាទិត្យតូច )
រក្សាសិទ្ធិ
No comments:
Post a Comment