សួនកំណាព្យ ៖ កំដរចិត្តឈឺឈប់ស្រឡាញ់អូន

កំដរចិត្តឈឺឈប់ស្រឡាញ់អូន

(បទពាក្យប្រាំពីរ)

១- ទឹកភ្នែកស្រក់ចុះពីបេះដូង

អារម្មណ៍ធីងធោងស្តាប់ពាក្យគេ

ត្បិតដឹងពាក្យពិតថាមាសមេ

មានស្នេហ៍ឲ្យគេមិនមែនបង ។

២- លួចយំរាល់ថ្ងៃព្រោះស្នេហ៍ពេក

ទោះដឹងហួសហេតុតែនៅប៉ង

ធ្វើឲ្យចិត្តស្នេហ៍ជាប់ចំណង

អ្នកឈឺគឺបងមិនមែនអូន ។

៣-ជាប់ឈ្មោះស្រឡាញ់សង្សារគេ

គ្មានចិត្តថយទេពីមាសស្ងួន

នៅតែព្យាយាមលាក់បំពួន

លួចស្នេហ៍នឹមនួនគ្មានថ្ងៃប្រែ ។

៤- ២១ កក្កដាទើបដឹងច្បាស់

ថាឈឺខ្លាំងណាស់ព្រោះតែស្នេហ៍

ស្រឡាញ់គេពេកភ្លេចខ្លួនថែ

ធ្វើឲ្យព្រួញស្នេហ៍ចាក់បេះដូង ។

៥- ទឹកភ្នែកផ្តើមហូរទើដឹងឈឺ

ចង់ឲ្យអូនលឺក្នុងបេះដូង

ថាជំងឺនេះឈឺស្ទើរសូន្យ

ហេតុម្តេចចិត្តអូនមានតែគេ ។

៦- ថ្ងៃនេះកំដរចិត្តឈឺចាប់

ហើយចង់ស្រែកប្រាប់ចិត្តមាសមេ

ថាបងឈឺល្មមហើយព្រោះស្នេហ៍

គ្មានចិត្តទៀតទេសម្រាប់យំ ។

៧- កំដរចិត្តឈឺឈប់ស្រឡាញ់

ប្រាប់ខ្លួនថាចាញ់និងទំហំ

ចិត្តស្រឡាញ់គេច្រើនជាងខ្ញុំ

ស្នេហ៍គ្មានទ្រនំបាក់បង្គង ៕

ក្រុងព្រះសីហនុ

ថ្ងៃទី ២២ ខែ កក្កដា ឆ្នាំ ២០១២

និពន្ធដោយ ៖ ហៀង ធារ៉ា

(ព្រះអាទិត្យតូច)

រក្សាសិទ្ធិ