សម្រស់ស្នេហ៍បុប្ជាជនបទ
( បទពាក្យប្រាំពីរ )
១-នឹកអនុស្សាកន្លងហួស
ចិត្តធ្លាប់រងគ្រោះព្រោះស្នេហា
បានដល់ជនបទលង់ចិន្តា
ស្រស់ស្រីបុប្ជានៅស្រុកស្រែ
។
២-អូនជាក្រមុំអ្នកចម្ការ
តែមានចរិយាសមជាខ្មែរ
គោរពចាស់ទុំស្តាប់ពាក្យម៉ែ
រៀនសូត្រខំថែវប្បធម៌ខ្លួន ។
៣-ត្បិតជាបងស្រីក្នុងគ្រួសារ
ខិតខំធ្វើការបានខ្ជាប់ខ្ជួន
មុនគេងបង្រៀនដល់ប្អូនស្ងួន
ទើបរៀបចំខ្លួនគេងតាមក្រោយ ។
៤-ព្រលឹមមិនទាន់ភ្ញាក់មុនម្តាយ
ប្រញាប់រៀបកាយធ្វើឲ្យហើយ
កិច្ចការក្នុងផ្ទះមុខនិងក្រោយ
ទើបស្រស់ត្រាណត្រើយទៅសាលា ។
៥-ពេលជួងចេញភ្លាមមិនអែអង់
ព្រោះចិត្តតូចតន់គិតគ្រួសារ
ថ្វីពុកនិងម្តាយទៅចម្ការ
មានតែជីវាជាបង្អែក ។
៦-ពេលភ្លៀងធ្លាក់ភ្លាមមិនចាំយូរ
ប្រញាប់គិតគូរមិនចាំស្អែក
ជួយធ្វើស្រែម្តាយមិនប្រកែក
ទោះចិត្តខំចែកខ្លួនជាស្រី
។
៧-ការងារក្នុងផ្ទះធ្វើគ្មានសល់
មិនឲ្យម្តាយខ្វល់ទោះយប់ថ្ងៃ
មិនដើរផ្ទះគេនាំអប្រិយ
មានពាក្យពីរបីស្រីមិនល្អ
។
៨-នេះចំជាស្រីអ្នកចម្ការ
មាយាទចរិយាស្រស់បវរ
ខិតខំរៀនសូត្រទោះខ្លួនក្រ
ដើម្បីត្រដរដូចគេឯង
។
៩-តាមដានអូនយូររឹតស្រឡាញ់
ក្នុងចិត្តលួចខ្នាញ់ចង់ថ្លាថ្លែង
ប្រាប់រឿងបេះដូងតែខ្លាចក្រែង
ពេលរៀមហាស្តែងអូនខឹងបង ។
១០-ទោះផ្កាជនបទក៏បងស្ម័គ្រ
ក្នុងចិត្តជំពាក់ស្នេហ៍នួនល្អង
កុំគិតថាមើលងាយស្នេហ៍ស្នង
តែបេះដូងប៉ងស្នេហ៍ស្រីពិត
។
១១-កវីផ្ញើស្នេហ៍ម្ចាស់ចម្ការ
ផ្ញើពាក្យស្នេហាប្រាប់វមិត្រ
កវីស្នេហ៍អូនមិនប្រែចិត្ត
សូមផ្ញើជីវិតដីស្រុកស្រែ
៕
ក្រុងព្រះសីហនុខេត្តព្រះសីហនុ
សរសេរចប់ថ្ងៃទី ០៩ ខែ កក្កដា ឆ្នាំ២០១២
និពន្ធដោយ ៖ ហៀងធារ៉ា
( ព្រះអាទិត្យតូច )
រក្សាសិទ្ធិ
No comments:
Post a Comment